Tewhid.mk

Јазичко значење: Теухид е инфинитив на глаголот вех-хаде, јувех-хиду и значи да издвоиш нешто помеѓу останатото, да сметаш за нешто дека е едно единствено.

Пример: Кога ќе кажеш Никој освен Мухаммед не смее да излезе од куќата тогаш си го издвоил Мухаммед, од останатите, давајќи му дозвола да излезе од домот. Или пак доколку кажеш: Само Халид може да го напушти собирот, тогаш тоа значи дека единствено Халид може да се одалечи од собирот.

Терминолошко значење: Да го издвоиш Аллаха  како единствен во:

1. Рубубијет (Владетел, Створител и Одржувач на сè);
2. Улухијет (Обожување); и
3. Неговите имиња и атрибути.

Поделба на Теухидот

Теухидот се дели на три вида:

1. Теухид Рубубије
2. Теухид Улухије
3. Теухид Ел Есмаи вес Сифат

Теухид Рубубије значи да веруваме и да го издвојуваме Аллах како Створител, Владетел и Управувач/Одржувач. Исто така тоа значи да го издвоиме како Единствен во делата кои му се својствени само Нему. Пример за дела кои му се својствени само на Аллах се: создавањето, снабдувањето, оживувањето, умртвувањето, спуштањето на дождот, никнувањето на растенијата и др.

Аргументи за овој вид на Теухид:

„Само Тој создава и управува“ (Ел А’раф, 54)

„На Аллах му припаѓа власта на небото и на Земјата“ (Али Имран, 189)

Запрашај: „Кој ве храни од небото и од земјата, чие дело се слухот и видот, кој го создава живото од неживото, а го претвора живото во не-живо, и кој управува со сé?“ – „Аллах!“, ќе кажат тие, а ти кажи: „Па зошто тогаш не се плашите од Него?“ (Јунус, 31)

Теухид Улухије е да го издвоиме Аллах како Единствен со делата на неговите робови. Примери за дела со кои се обожува Аллах се: Намазот, постот, хаџот, потпирањето врз (тевекул), заветот, стравот, надежта, љубовта и сл.

Аргументи за овој вид на Теухид се:

„Џинните и луѓето ги создадов само за да Ме обожуваат.“ (Ез Заријат, 56)

„И Аллаха обожувајте Го и немојте никого да му го придружувате (како достоен за ибадет).“ (Ен Ниса, 36)

„И пред тебе не пративме ниеден пратеник а да не му објавивме: Нема друг бог освен Мене па затоа Мене обожувајте ме.“  (Ел Енбија, 25)

Теухид Ел Есмаи вес Сифат значи да го опишуваме Аллаха со зборовите со кои Самиот себеси се опишал и со кои го опишал Мухаммед, сал-лаллаху алејхи ве селем. Со својства кои укажуваат на совршенство и возвишеност, без текјиф (зборување за каквото на тие својства), без темсил (поистоветување и споредување на тие својства со особините на сè што Аллах го создал и обратно), без техриф (искривување на значењата на тие својства) и без та’тил (негирање на самите атрибути/својства).

Аргументи за овој вид на Теухид:

„Ништо Нему не му е слично! Тој сe слуша и сe гледа.“ (Шура, 11)

„На Аллах Му припаѓаат најубавите имиња и повикувајте Го со нив, и тргнете се од тие што ги искривуваат Неговите имиња, како ќе прават, така ќе бидат казнети! “ (Ел А’раф, 180)

Важни напомени

Прва: Видовите на Теухидот се меѓусебно условени и поврзани. Секој вид е неодвоив од останатите видови и доколку изостане еден од овие три видови тогаш човекот не е вистински мув-вехид (тој што верува и го обожува само Аллах).

Втора: Неопходно е да знаеме дека неверниците против кои војувал Мухамед, алејхи селам, го прифаќале Теухид Рубубије, верувале дека Аллах е Создател и Снабдувач, Тој што дава живот и умртвува, во Негова власт е користа и штетата, тој одржува и управува со сè.  Ваквото верување сепак не ги внесе во Ислам и аргумент за ова тврдење е ајетот во кој Возвишениот Аллах вели:

Запрашај: „Кој ве храни од небото и од земјата, чие дело се слухот и видот, кој го создава живото од неживото, а го претвора живото во не-живо, и кој управува со сe?“ – „Аллах!“, ќе кажат тие, а ти кажи: „Па зошто тогаш не се плашите од Него?“ (Јунус, 31)

Трета: Теухид Улухије беше причината поради која Аллах праќаше пратеници, затоа што истиот е основа врз која се издигнуваат останатите дела. Без Теухид Улухије сите дела се безвредни, затоа што недостатокот на Теухид Улухије подразбира постоење на Ширк (Припишување на еднаков на Аллах во ибадет). Сржта на борбата помеѓу Божјите пратеници и нивните

 народи беше токму овој вид на Теухид па затоа на истиот треба да му се посвети посебно внимание и истиот темелно да се проучи.

припрема 
www.tewhid.ucoz.org

од книга-ТЕВХИД.Знаењето за Теухидот во олеснета форма

Автор:
Абдуллах ибн Ахмед Ел Хавил

Превод:
М-р. Талха Куртиши